Wie sou kon dink ’n dak kan die begin van ’n hele liefdesverhaal wees?

In 2021 het ons ontmoet op ’n manier wat beslis nie soos die begin van ’n romantiese fliek klink nie. Hy het by haar huis opgedaag om ’n kwotasie te doen om haar dak reg te maak. Sy was op daardie stadium net nog ’n kliënt. Min het ons geweet daardie kwotasie sou uiteindelik baie meer werd wees as net ’n nuwe dak.

Wat begin het as ’n eenvoudige ontmoeting, het stadig verander in ’n besonderse vriendskap. Ons het begin praat… en praat… en praat. Tyd saam, familiekuier, koffie en donuts, inkopies en die klein alledaagse dinge het ons nader aan mekaar gebring. Sonder dat ons dit besef het, was ons besig om die fondament van iets baie groter te bou.

’n Paar maande later was daar ons eerste soen – nie juis die mees beplande eerste soen nie, maar dit het gewerk. Nie lank daarna nie het ons besef dat ons nie net goeie vriende geword het nie… ons het verlief geraak.

Ons het mekaar gevind in ’n tyd toe ons albei deur baie gegaan het, en sonder om dit te probeer, het ons vir mekaar ’n veilige plek geword. Deur die mooi én moeilike dae het ons geleer dat liefde nie perfek hoef te wees nie – dit is om mekaar steeds te kies, elke dag.